Geo BUNISCHEM
News
Noms nu sun n'eir na simplamaing noms. Noms tradischan eir bler sur da l'istorgia d'ün lö, sur da sia funcziun o chi chi d'eira il possesur da quel toc terrain. Per exaimpel il nom Clüs, ün lö chi vaiva plü bod intuorn üna saiv, il Runc probabelmaing deriva dal verb runcar, ed il Traversurs sarà stat la traversa sura, üna scurznida per na tour la traversa suor. Il Traversuor nu daja pero sco nom local.
A mai para quai fich interessant e perquai n'haja güzzà mias uraglias e scrit sü tuot ils noms ch'eu vaiva dudi üna jada e ch'eu cugnuoschaiva fingià. Auters noms n'haja dumondà a meis bap, cuntschaints e paraints. Uschennas haja dat üna glista cun tschients da noms in meis cuntuorns.
Bel es eir cha noms varieschan, els vivan e's müdan. Üna famiglia ha minchatant üna auter nom pel listess muot, o il listes nom per ün auter muot. Quai nu fa tuot l'istorgia plü simpla pero plü interessanta.
Perquai suna eir fich interessà da survgnir nouvs noms, auters noms, reclamaziuns e resuns.
Noms rurals, noms locals, toponims o co chi's less eir be ma dir, quai sun noms da prada, pas-chs, muntognas, fastens, gondas e da bler auter in nossa cuntrada.
Plü bod vaivan tals noms üna fich grond'importanza. Hozindi vana planet in invlidanza. Plübod staiva la fantschella savair magari precis ingio ch'ella dess manar la marenda als praders. 100 meters plü insü o plü ingiò sun fingià ün per minuts retard giond a pè. Hozindi cul auto o cul tractor nu fà quai oura plü nöglia. Cun l'arondimaint da la prada sun eir las parcellas blerun plü grondas. Ingio chi's vaiva plü bod quatter o tschinch pras, minchün cun sies nom, es uossa ün praüffel chi ha il listes nom sco quels duos pras daspera.
Eir scha'ls noms nu n'han plü tal'importanza am par'important da tils chürar e da tils mantgnair.
Administratur: Armon Schlegel, CH-7545 Guarda
Copyright 2012